Ядуусын хороололд амьдардаг нэгэн ‘Би хэдэн сая долларын орлоготой том компаний эзэн болно’ гэж хөршүүддээ ярьвал түүнийг ‘том санаатай, шуналтай амьтан’ гэж дургүйцнэ, эсвэл дооглох байх. Яагаад гэвэл тэдний дунд сая битгийн хэл арван мянган долларын орлого олж үзсэн хүн мэдээж ховор. Том санаа гэдэг амжилтын нэг чухал орц гэнэ. Их санахгүй л бол том зүйлсийг “боломжтой” хэмээн том харч чадахгүй. Учир нь ихэнх зүйлс бүтэх хүртлээ боломжгүй гэгддэг. Тэнгэрт нисч болно гэдэг биелшгүй, хэт том санаархал байсан, гэхдээ зөвхөн биелэх хүртлээ шүү дээ. Хүний дуу хоолой, дүрсийг нэг газраас нөгөөд дамжуулж болно гэдэгт итгэж байсан хүн бол үүнийг ‘бүтэшгүй, том санаархал’ гэж бодож байсан хүмүүсийн хувьд ‘их зантан’ байсан нь мэдээж.

Таны одоогийн нөхцөл байдлын хувьд хүрэхийг хүсч буй зүйл чинь боломжгүй мэт санагдаж байвал танд “боломжтой” гэж итгэх их зангийн тодорхой тун хэрэгтэй гэсэн үг.

Мартин Лютер Кинг өөртөө итгэлгүй, ичимхий бүрэг залуу байсан гэдэг. Хүний эрхийн хөдөлгөөнүүдэд оролцох шаардлага их гардаг ч үргэлж татгалзаж, зугтаадаг байж. Харин түүний амьдрал үүний төлөө зориулагдсан болохыг ухаарсан тэр өдрөөс хойш жинхэнэ амьдрал нь эхэлсэн гэж ярьсан байдаг. Америкийн хар арьстнуудын эрх ашгийг хамгаалж, тэдний дуу хоолой болохоор төрсөн гэдгээ мэдэрсэн үеэс л ямар ч бэрхшээл түүнийг зогсоох хүчгүйг ойлгосон гэдэг.

Марк Твайн нэгэнтээ: Хүний амьдралын хамгийн чухал 2 өдөр бол: Эхээс мэндэлсэн өдөр, мэндэлсэн шалтгаанаа ойлгосон өдөр гэж.

Түүхэн цаг үеийн агуу хүмүүс, тухайлбал Наполеон Бонопарт өөрийгөө Бурханы илгээсэн элч, эсвэл энэ мэтийн онцгой зориулалттай хүн гэж итгэдэг байж. Энэ итгэл үнэмшил нь тэднийг том санаатай болгож өөртөө итгэх агуу итгэлийг төрүүлдэг байсан байна. Мэдээж бид түүн шиг экстрийм үзэлтэй байх албагүй ч энэ хорвоо дээр амьдарч буй шалтгаанаа заавал ойлгох хэрэгтэй гэнэ. Хэн ч санамсаргүй хүн болж төрдөггүй ... ер нь хорвоо дэлхий дээр санамсаргүй зүйл гэж байдаггүй, бүх зүйл шалтгаан үр дагавартай гэж Буддын гүн ухаанд үздэг байна. Хүн болохооргүй байсан ч болсон л бол, мэндэлсэн л бол та энэ хорвоод заавал ирэх ёстой, зориулалттай нэгэн.

Амжилтанд хүрсэн хүмүүс ийм мэдрэмжээр хөглөгдөж, тэдний хувьд амьдралын зорилго нь зүгээр амьд явахаас илүү чухал болохыг яс махандаа шингэтэл ойлгодог аж.